ភ្នំពេញ៖ បេក្ខភាពនាយករដ្ឋមន្ត្រីនាពេលអនាគតរបស់គណបក្សប្រជាជនលោក ហ៊ុន ម៉ាណែត បានលើកឡើងថារដ្ឋាភិបាលធានានូវសិទ្ធិស្របច្បាប់ដល់ពលរដ្ឋគ្រប់រូបក្នុងការធ្វើអ្វីមួយដែលខ្លួនឯងចង់ តែមិនធានាថាអ្វីដែលពលរដ្ឋចង់ធ្វើនោះមានទីផ្សារនោះទេ។ លោកបានស្នើដល់ពលរដ្ឋអនុវត្តនូវសិទ្ធិរបស់ខ្លួនឱ្យបានត្រឹមត្រូវកុំបំពានលើសិទ្ធិរបស់អ្នកដទៃ។

នេះជាការថ្លែងរបស់លោក ហ៊ុន ម៉ាណែត ទាក់ទងនឹងករណីលោក ឯម រៀម ដែលបង្កភារពប្រទាំងប្រទើសក្នុងសង្គមនាប៉ុន្មានថ្ងៃមកនេះ។

លោក ហ៊ុន ម៉ាណែត បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការអាគារតេជោសែនវិទ្យាសាស្ត្រ និងបច្ចេកទេស និងប្រគល់សញ្ញាបត្រជូនដល់និស្សិតវិទ្យាស្ថានជាតិពហុបច្ចេកទេសកម្ពុជានៅរាជធានីភ្នំពេញ នាថ្ងៃទី២៤ ខែមីនា ឆ្នាំ២០២៣ ថាការបញ្ចេញយោបល់គឺជាសិទ្ធិរបស់ពលរដ្ឋគ្រប់រូប តែការបញ្ចេញយោបល់ដោយការជេរប្រទេចគឺវាហួសវិស័យមិនអាចទទួលយកបាន។

លោកថាករណីលោក ឯម រៀម យើងអាចឃើញហើយថារដ្ឋាភិបាលបានធានានូវសិទ្ធិក្នុងការធ្វើអ្វីដែលខ្លួនចង់ធ្វើដោយស្របច្បាប់។

លោកថា៖ «រដ្ឋាភិបាលមិនធានាថាទីផ្សារគ្រប់ទាំងអស់បានទេ តែក៏មិនបិទសិទ្ធិស្របច្បាប់ក្នុងការធ្វើកិច្ចការអ្វីទេ»។

នៅប៉ុន្មានថ្ងៃមកនេះមានការផ្ទុះការចាប់អារម្មណ៍លើអ្នកច្នៃម៉ូតម្នាក់ឈ្មោះ ឯម រៀម ភេទប្រុសដែលបានច្នៃម៉ូតពាក់អាវមិនចំអាវ រ៉ូបមិនចំរ៉ូប រងការរិះគន់ជាខ្លាំង ខណៈអ្នកគាំទ្រលោក ឯម រៀម ថានេះជាសិល្បះនៃការច្នៃម៉ូដបែបសហសម័យ៕